41. Алтан лиш

Алтан лишийн дэлбээнд тогтсон хурын ус

Алгуурхан доошилсоор хөрсөнд шингэх мэт

Ариун хайрын сэтгэлээ илчилсэн харц

Аньсага нүдээр дамжин амрагийн зүрхэнд шингэмүй

Хүлэг морьдын тоосонд дарагдан

Холдон одох амрагаа үдэх бүсгүйн

Хойноос нь өргөсөн сүүн цацлууд

Хөх тэнгэрт сүүн далай үүсгэмүй

Амь өрссөн ширүүн тулаанд

Алалдах дайсантай хатгалдах

Аймшиггүй зоригт залуу баатрын

Аз хийморийг тэнгэрээс сүүн дуслууд тэтгэмүй

Харь хол хүний нутгаас

Хүнд бэрх аян дайнаас

Харьж гэртээ ирэх баатрын

Харгуй замыг нь сүүн дуслууд гэрэлтүүлмүй
Удаан хагацсан амраг хосууд учран золгоод
Учиртай үгээ шивнэлдэн байхуй
Урьдын сайхан ерөөл амилан урсаад
Уудам хорвоог хайрын сэтгэлээр бялхаамуй