23. Жанжин

Жанжин гэдэг зандрахын нэр биш
Жанжин гэдэг занчихын нэр биш
Жанжин гэдэг зандалчин биш
Жанжин гэдэг зарлигаар өргөмжилсөн алдар
Жанжин гэдэг увайгүй түрэмгийн нэр биш
Жанжин гэдэг урвагч шарвагчийн нэр биш
Жанжин гэдэг хий хоосон сүр биш
Жанжин гэдэг хайрлах сэтгэлгүй араатан биш
Жанжин гэдэг шалгарч тодорсон ухаан
Жанжин гэдэг шантарч үзээгүй хатуужил
Жанжин гэдэг оройлон манлайлсан уухай
Жанжин гэдэг од шиг гялалзсан хийморь
Жанжин гэдэг өөрийгөө ялсан баатар
Жанжин гэдэг өрөөлийг дагуулсан суу заль
Жанжин гэдэг хас төрийн түшиг
Жанжин гэдэг хатгалдах дайсны халх
Жанжин гэдэг жаргаж олсон нэр биш
Жанжин гэдэг жаргалаа хугасалсан тэвчээр
Жанжин гэдэг илүү асгарсан хөлс
Жанжин гэдэг итгэл даасан нөмөр
Жанжин гэдэг эрийн сайн эр
Жанжин гэдэг эрэлхэг зоригийн туйл
Жанжин гэдэг ган бат сахилга
Жанжин гэдэг гуйвашгүй үнэнч итгэл
Жанжин гэдэг үхэл амьдралыг дэнслэгч
Жанжин гэдэг үг дуугүй захирагдагч
Жанжин гэдэг гудайж үзээгүй тэргүүн
Жанжин гэдэг гундах эрхгүй жавхаа
Жанжин гэдэг бөхийж үзээгүй туг
Жанжин гэдэг бүтэн улсын манаа
Жанжин гэдэг хүсэвч олдохгүй нэр
Жанжин гэдэг хусавч арилахгүй алдар