Алтлаг өнгөт шүхэр

Хус модыг матаж хийсэн
Халиун бугын арьсыг татан сунгаж бүрсэн
Хонх холбого жингэнүүртэй
Халин дүүлэх жигүүртэй
Хүнгэнэх дуунд нь хөх лусд баяссан
Хангинах дуунаар нь хайрхан уулс сэрсэн
Хар муу бүхнийг хага яран цуурайтсан
Хагацал зовлонг үргээж сүүн зам татуулсан Хараал жатгыг хариулж
Харыг цагаанд урвуулсан
Гарвал угсааны нууцыг агуулсан
Галын эздийн дүрийг шингээсэн
Гариг эрхсийн хооронд зорчуулсан
Гайхамшигт дээдсийг урин дуудсан
Гай гамшгийг дэлдэн хөөсөн
Галзуу барын хүрхрээнтэй
Галигуулан жороолох төвөргөөнтэй
Галаар тургисан луутай
Гал усны гашуун зовлон
Галав юүлэх үнэн зовлонг туулж туучиж ирсэн Тэнгэр таалсан модыг шигтгэж амилуулсан Тэнгэрт өргөсөн андгайгаа шивнэж тамгалсан Тэнгэрт дэвшсэн өвгөдтөйгөө учран золгох тойрог минь
Тэнгэрийн тааллаар замнах өөрийн мэдэлгүй төөрөг минь
Тэнгэрлэг дээдсийнхээ тамлага дуудлагыг дуудахуйд
Танил дотно үнэр нь таатайяа сэнгэнэнэ
Төгрөг хэнгэргээ аван тэргүүн дээрээ залахад Тэнгэр дээрээс минь нөмөрнө
Тэвэрч дэрлээд хэвтэхэд
Тэнгэр намайг өвөртөлнө
Арван цагаан хуруугаараа
Атган дэлдэх хэнгэрэг минь
Амь биеийг хамгаалсан
Адбиш чадалт бамбай юм
Адын хорлолоос халхлах
Алтлаг өнгөт шүхэр юм
Амь амьдралыг минь даасан
Атгахан зүрхний тольт юм
Алаг сүлдний эздийн
Ариун нандин шүтээн юм.