Үлгэр эхлүүлэх шүлэг

Эртнээс эдүгээг хүртэл туулж ирсэн замыг
Ээдрээт амьдралын нугачаанд алдаж оносон түүхийг
Ээдүүлэлгүй хадгалж ирсэн сурвалжит удмын цадигийг
Эзэнт гүрний туган дор
Энхжинг цогцлоосон мөчүүдийг
Эзэрхэг түрэмгийд эзлэгдэж
Энэлэн шаналсан жилүүдийг
Атгасан шагай мэт нэгдэж
Алдараа дуурсгасан агшнуудыг
Алтайн уулсаас эхтэй
Аугаа баатарлаг түүхийг
Ахан дүүс эвдрэлцэж
Алалдан тэмцсэн эмгэнэлийг
Алдаа эндлийн горыг
Амиараа төлсөн үнэнийг
Зуун зууны явдлыг хураангуйлж
Зуун найман үлгэрт өгүүлж
Зузаан зузаан судар бичгийг
Зургаан үгэнд багтаан шингээж
Зүрхний гүнд нойрсох үнэнийг
Зүүд зөнгөөр даллан сэрээж
Олон оны өмнө ам алдсанаа цайруулж
Олон үеийн өвгөдийн түүхээс
Онцгойлон сонгон шилж
Орчлон хорвоогийн жамыг хүүрнэж
Оюунтай төрсөн балчруудыг
Осол эндлээс сэрэмжлүүлье хэмээн
Монгол нь монголоо хайрладаг болох
Маргаашийн гэрэлт ирээдүйг хүсэмжлэн
Монгол нь монголоороо оршоосой хэмээн
Морьтон баатруудын үлдээсэн
Мартагдсан түүхийн бүдэг жимээр
Молхи би бэдэрхээр зоригловой
Саар нь сайнд урван
Сайн сайханд хөтлөөд
Саатан сонордох бүхний
Сэтгэлийн шарх аних болтугай!
Саруул ухаантай үрсийн
Санаж сэрэх сэжүүр болог
Үе дамжин удамшиж
Үндэс мөчрийг хэрсэн
Үрэвч үл арилах
Үйлийн үр цайрч
Үр хойч минь ухаажиж
Үндэс мөчир минь бэхжих болтугай!