Төмөр амилах цаг

Ган төмрийг үнсэн байж
Ганихарсан сэтгэлээ уудална
Гавал тархины мухар дахь
Ганцаардсан бодлоо аргадна
Галав эриний чанад дахь
Гажаагүй үнэнд дөхнө
Хаш цагаан шүдээрээ хашин байж хуурдана
Хасын өнгөт хуруугаар
Хүрэн зүрхээ товшино
Хахирган хатуу бүхнийг уяраан байж хуурдана
Хар цагаан сүлэлдэн харгуй замд хөтөлнө
Хал нь гаднаа өвгөдийн хайранд умбана
Дотроо шивнэсэн үг минь
Дом болон гадагшилна
Долоон үеийн дээдсийн шид чадал шингэнэ
Домог түүх амилж
Дарагдсан бүхэн сэргэнэ
Дотор бугшсан бүхэн дээш огшин оволзоно
Усан нүдээр харшгүйг
Ухаан санаандаа тольдоно
Уул усны дуудлага
Урсах цусаар дамжин
Удам гарвалын түүхийг учирлан байж хүүрнэнэ
Унаган төрөлх бүхний уг төрх тодорно
Гал ус харшиж уур манан савсана
Галзуу догшин эрчис багтаж ядан бялхалзана
Ган төмөр амилж
Гангар гунгар дуулна
Галд ширээгдсэн биеэс нь
Гашуун нулимс дусална
Газарт уналгүй тэнгэрт дэгдэн ууршина.