45. Эрийн хийморь

Эрхэт тэнгэрийн ивгээлээр

Эр заяаг онож төрсөн

Эгнэшгүй хүчит эрдэм ухаан төгс

Эр хүний хийморь сүлдийг хурайлан дуудсу

Хүн гүрний үеэс хөрстийг чичрүүлсэн эрийн хийморь

Хөх Монголын туган дор дэлхийг хураасан эрийн хийморь

Хашхираа уухай нь хад асга нураагч эрийн хийморь

Халдах дайсныг мохоон дарагч эрийн хийморь

Мөндөр мэт асгарах суманд оногдолгүй гарсан эрийн хийморь

Мөнгө өнгөнд автаж сүнсээ арилжаагүй эрийн хийморь

Мөрөн голыг туулавч Монголоо мартаагүй эрийн хийморь

Мөнх тэнгэрт сүслэж мөрлөж өндийсөн эрийн хийморь

Багтаж ядсан бяр халгисан их итгэл эрийн хийморь

Бараа ихт бардам омогт баатар зоригт эрийн хийморь

Босоогоороо нөгчиж дахин төрсөн эрийн хийморь

Болохгүй бүхний эсрэг эрслэн боссон эрийн хийморь

Хангарьдын дэвэлтээр дэвж 

Харцага шонхор мэт хуурнин шуугигч эрийн хийморь

Хар муу бүхэнтэй хутгалдавч сэвтэж гундаагүй эрийн хийморь

Хайр энэрэл хүндлэлийг тэнцүүлж ирсэн эрийн хийморь

Жаргал зовлонгийн алинд нь ч хугарч нугараагүй эрийн хийморь

Жаахан буурал ээждээ сөгдөж мөргөсөн эрийн хийморь

Жам ёсыг ухаарч хатуужсан эрийн хийморь

Жаргаж байна хэмээгээд зовлон тариагүй эрийн хийморь

Уртын дуу шиг амьдарсан эрийн хийморь

Уудам тал шигээ сэтгэсэн эрийн хийморь

Удам залгах үрээ өөрөөсөө илүү хайрласан эрийн хийморь

Ужиг самуун бүхэнтэй үл эвлэрэх эрийн хийморь

Үхлийн өмнө сөгдөж амь гуйгаагүй эрийн хийморь

Үдлээд мордох хорвоод өөртөө үнэнч байсан эрийн хийморь

Үнэн шударгын төлөө эрсдэхээс айгаагүй эрийн хийморь

Үг үйлээ үнэн болгосон эрийн хийморь

Давхиж буй гөрөөсний хар нүдийг алдалгүй харвах эрийн хийморь

Доройг асарч дээрэнгүйг дарсан эрийн хийморь

Даравч далдайх булавч бултайх эрийн хийморь

Далай их улсын багана нь болсон эрийн хийморь

Эрхийдээ ончтой элгэндээ сөстэй эгэмэндээ бяртай

Эрхэт тэнгэрийн хөвүүд ижийн хайртай үрс

Эгэлгүй заяанд төрсөн

Эр бор харцагууд минь

Санасан бүхэн чинь сэтгэлчлэн бүтэж байг

Сарвайсан бүхнээ саадгүй авч байг

Саар муу бүхэн халдаж чадалгүй тойрч байг

Сайн сайхан бүхэн салалтгүй хамт яваг

Хөх Монголын эрчүүдийн хийморь золбоо нь өөдөө байг

Хөх мөнх тэнгэрт ивээгдэн ямагт мандан бадарч байг

Хүмүүн төрөлхтөний охь манлай болон

Хүндлэл хайрыг нь хүртэж яваг

Хурай Хурай Хурай