Аянгат Дээдсийн амилуулсан Мичиган нуурын эрэг дээрх Удган мод
Ерөөлт салхинд туугдан Их Нуурын эрэгт унасан
Есөн учгаар учиглагдан шившигдсэн
Ер бусын нэгэн үрээс сондгойрч соёолсон
Ертөнцөд цор ганцхан мод билээ би
Удаж удаж нахиалсан би удган мод
Удаанаас удаан амьдрах учиртай би удган мод
Уул усыг аргадсан би удган мод
Ургамал амьтныг хамгаалсан би удган мод
Үндэс минь газрын гүн рүү шигж
Үзүүр минь тэнгэр өөд тэмүүлнэ
Үй түмэн амьтны үйийн үрийг цайруулж
Үртэй бүхнийг үржүүлж үндэстэй бүхнийг дэлгэрүүлэгч би удган мод
Харахад залуухан ч
Хал үзсэн хашир мод
Хатуу даалгавар хүлээж
Халаагүй манаанд гарсан харуулын нэгэн мод
Би газар тэнгэрийг холбогч
Би хүмүүн байгалийн хэлмэрч
Би илч эрчмийг хураан цуглуулагч
Би илч эрчмийг түгээн тараагч
Хөх Монголын уугуул нутгаас салж нүүгээд
Харь хязгаар нутгийг эзэмшин суусан
Хөх толботон эрэлхэг үрсийн сүнс сүлд
Хүсэл мөрөөдөл захиас нь шингэсэн би хөх толботой мод
Би хатуу бүхнийг зөөллөгч
Би хайр энэрлийг түгээгч
Би хар бүхнийг цайруулагч
Би хожмоо хатан заяанд мэндлэх охин үр
Би - гүүр
Би - хана
Би - шат
Би - Удган мод
0 сэтгэгдэл:
Kommentar veröffentlichen