58. Аадар

Тэнгэр бүрхэн чимээ аниргүй ноёрхоод
Тэртээд ганц нэг цахилгаан цахиад
Тэвчээрийн хүлээс зад үсрэн тайлагдаад
Тэнэгрэл мунхаглал эцсийн цэгтээ тулаад
Амьсгалах агаар дээш сорогдон одоод
Амьтай голтой бүхэн үймж сандчаад
Айдас хүйдэс амьсгалж болхуйц мэдэгдээд
Айсуй аадрыг хүлцэнгүй хүлээмүй
Бараан үүлс ганц нэгээр хурсаар
Багширч мушгирсан хар луу болоод
Бараа сүрээрээ нарыг хааж халхлаад
Байгаа бүхнийг ниргэхээр завдмуй
Түнэр харанхуй орчлонг нөмрөөд
Түмэн амьтан эх толгойгүй үймээд
Төгсгөл хаяанд ирсэнийг зөнгөөрөө мэдэрч
Тулж ирсэн шинэ эхлэлийг хүлээж дэнсэлмүй
Аянга цахилгаан хэнгэрэг хагартал нижгэнээд
Аюумшигт цагаан гэрэл нь өдөр мэт гийгүүлээд
Аадар бороо сад тавин асгараад
Ангаж цангасан талын элгэн дээр буумуй
Тэнгэр цэлмэн чимээ аниргүй ноёрхоод
Тэртээд ганц нэг цахилгаан цахиад
Тэнгэрийн ташуур нэгэнтээ ширвээд өнгөрхүйд
Тэнэгрэл мунхаглал эцсийн амьсгалаа хураамуй