38. Хүлээлт

Хүний хорвоо хүлээлтээр дүүрэн
Хүслээ биелэхийг хүлээнэ
Хүрээд ирэхийг нь хүлээнэ
Хүсээгүй бүхнээ арилан одохыг хүлээнэ
Аз жаргалыг хүлээнэ
Авралыг аврагчтай нь хүлээнэ
Амжилт бүтээлийг хүлээнэ
Амьдралаас уйдсан нь үхлээ хүлээнэ
Сайн мэдээ хүлээнэ
Сайхан амьдралыг хүлээнэ
Санаа зовох зүйлгүй болохыг хүлээнэ
Сарниж одсон зүүдээ эргэн ирэхийг хүлээнэ
Зовлонгоо дуусахыг хүлээнэ
Зоргоор чөлөөтэй болох мөчөө хүлээнэ
Золгүй тохиолдлууд дуусахыг хүлээнэ
Зөн совингоо шивнэхийг хүлээнэ
Учир нь олдохгүй бүхний хариуг хүлээнэ
Учир битүүлэг бүхний учир олдохыг хүлээнэ
Учирснаасаа илүүг хүлээнэ
Учрах ёсгүйгээ ч хүлээнэ
Маргаашийн нарыг хүлээнэ
Маргааш болох эсэхийг мэдэхгүй ч хүлээнэ
Мөрөөдлөө биелэхийг хүлээнэ
Мөдхөн ирэх аз жаргалыг хүлээнэ
Заяаны ханиа хүлээнэ
Заяа тавилангаа сайнаар эргэхийг хүлээнэ
Зайлшгүй ирэх ёстой хэмээн байхгүй бүхнийг хүлээнэ
Заавал байдаг хэмээн байхгүй зүйлийг ч хүлээнэ
Хэзээ ч ирэхгүйг нь мэдсээр атал хүлээнэ
Хэзээ ч биелэхгүйг нь мэдсээр атал хүлээнэ
Хүлээлт гэдэг нь итгэл найдварын тасархай юм
Хүний амьдралыг хөдөлгөгч гол хүч нь юм
Сэтгэлд багтсан бүхэн хүлээлт дагуулна
Сэтгэлээс ургасан бүхэн хүлээлт үүсгэнэ
Сэтгэл хэмээгч нь өөрөө хүлээлт юм
Сэрж мэдэрч үргэлж шинийг хайсан хүлээлт юм