100.Зааг

Үнэн худлын дундуур
Үүр шөнийн заагаар
Үхэл амьдралын хооронд
Үндэс мөчрийг самнан
Гэрэл сүүдрийг дамжин
Гэнэн хүсэлдээ хөтлөгдөн
Гэгээнтэн хийгээд мунхагууд
Гэмтэн хийгээд гэмгүйчүүдтэй хамт
Өнгөрсөн ирээдүйн хооронд
Өөртэйгөө болон өрөөлтэй тэрсэлдсээр
Өнгөн дүрс гаднах хэлбэртэй сөргөлдсөөр
Өөрийгөө би хайсаар байна
Бодьтой бодьгүйн хооронд
Болсон болоогүйн хооронд
Бурхан чөтгөрийн хооронд
Буян нүглийн хооронд
Ил далдын хооронд
Илэрхий нуугдмалын хооронд
Их багын хооронд
Ирээд явсан ба ирээгүй бүхний хооронд
Сод ухаан солиорлын хооронд
Сониуч зан сэрэхүйн хооронд
Сохор мэлмийтэний хооронд хэр их зайтайг
Сонордоод мартсан бүхэн минь хаана байгааг олохоор
Харанхуйн дунд тэмтчин туулсан замаа хайна
Хуурмаг төсөөлөл итгэл найдвараа таягдан хаяад
Хаа хүрэхээ гагц зүрх сэтгэлдээ даатгаад
Хад мөргөн мухардахаас айхгүйгээр бэдэрнэ
Захгүй далайн дундаас өөрийгөө хайж бэдрэхдээ би
Заагийг хэрхэн давж зах хязгааргүйд нэвтрэх вэ
Зах хязгааргүйд нэвтэрснээ заалгалүйгээр хэрхэн мэдэх вэ
Залхуурлаа хэрхэн давж заяа тавиландаа эзэн суух вэ
Хязгаарыг давж хүрээгээ тэлэхэд
Хүч минь дутваас хаанаас хэрхэн нөхөх вэ
Хил хязгаар зааг бүхнийг хэрхэн чөлөөтэй нэвтлэх вэ
Хил хязгаар зааг бүхнийг хэрхэн чөлөөтэй нэгтгэх вэ
Алив бүхнийг алган дээрээ тавьсан мэт хэрхэн тольдох вэ
Алив бүхнийг зааглагч алтан дундажыг хэрхэн олох вэ
Алив бүхний алтан дундаж дээгүүр холбиролгүй хэрхэн замнах вэ
Асуулт бүхэндээ хэрхэн өөрөө хариулах вэ
Үгээ хэрхэн үйл болгох вэ
Үйлээ хэрхэн үнэн болгох вэ
Үнэнийг хэрхэн нотлон батлах вэ
Үүрд мөнхийн учигт хэрхэн хүрэх вэ